Оҙайлы йәйге ялдарҙан һуң Х.Әхмәтов исемендәге Башҡорт дәүләт филармонияһының ижади коллективтары йәнә гастролдәргә сыға. Тәүгеләрҙән булып йырлы сәфәрҙе уҙған миҙгелдең юбилярҙары - «Карауан» һәм «Далан» төркөмдәре аса.

    «Карауан» егеттәре 79-сы ижад миҙгеленең гастролдәрен Туймазы, Йәрмәкәй һәм Бәләбәй райондарында башлай. Уларҙың дәртле, үҙенсәлекле юбилей программаһы 19 сентябрь Туймазы ҡалаһының «Родина» мәҙәниәт һарайында, 20-һе Ҡандра ҡасабаһында үтәсәк. 22 сентябрь егеттәр Туймазы районы Үрге Бишенде ауылы тамашасылары менән осрашасаҡ. Артабан «Карауан»дарҙың карауаны  Йәрмәкәй тарафтарына юллана.  Төркөм солистары: Марсель Ҡотоев, Рөстәм Шаһыбалов, Тимур Рамаҙанов, Эльмир Әбүбәкиров һәм уларҙың ижадташ дуҫтары:  Ильнур Һибәтуллин (ҡурай), Регина Баракованың (бейеү) сығыштарын Йәрмәкәй районы мәҙәниәт һарайында 24 сентябрь күрергә мөмкин. Сентябрь айы гастролдәрен «Карауан» төркөмө 25-ндә Бәләбәй ҡалаһында тамамлай. 

     Башҡортостандың халыҡ артисы Артур Туҡтағолов етәкселегендәге «Далан» төркөмөнә килгәндә, улар гастролдәр миҙгелен республикабыҙҙың төнъяҡ-көнбайыш райондарында башлай. 19 сентябрь «Далан» үҙенең юбилей программаһын Саҡмағош ауылы халҡына тәҡдим итә. Ә 23 сентябрь тамаша Дүртөйлө ҡала мәҙәниәт һарайында үтәсәк. Программала Артур Туҡтағолов, Миңзифа Исҡужина, Искәндәр Ғәзизов, Филүс Ҡалмурзин, Анастасия Скарженюк һәм башҡа сәхнә йондоҙҙары ҡатнаша.

Йыр-моң һөйөүсе дуҫтарыбыҙ, концерттарға рәхим итегеҙ!