Сәләмәт тормошҡа әйҙәгән сарала быйыл республиканың дүрт тиҫтәгә яҡын районы һәм Сибай ҡалаһы ҡатнашырға теләк белдергән. Һөҙөмтәлә 90-ға яҡын ауыл хәмерҙән баш тартты.

"Айыҡ ауыл" акцияһы быйыл мартта старт алды. Хәмергә ҡаршы көрәш проектына республиканың 40 районының 85 ауылы ҡушылды. Комиссия ағзалары проектта ҡатнашҡан һәр бер ауылға тиерлек барып эш барышы менән яҡындан танышты. Конкурстың күҙ буяу өсөн генә үтмәүе урындарҙа асыҡ күренә, ти ойоштороусылар. Һөҙөмтәлә еңеүсе итеп өс ауыл -  Әбйәлил районының Рәхмәт ауылы, Иглиндең Үктәй ауылы биләмәһе һәм Бүздәк районының Төрөш ауыл хакимиәте билдәләнде. Улар ике йөҙ мең һум аҡса менән бүләкләнәсәк. Бынан тыш, еңеүселәр 10 номинацияға бүленеп асыҡлана. Уларға ла 40 мең һум күләмендә аҡсалата бүләк биреләсәк. Еңеүселәрҙе тәбрикләү тантанаһы оҙаҡламай үтәсәк. Ә ойоштороу комитеты киләһе йыл уҙасаҡ конкурс үҙенсәлектәрен билдәләй. Киләсәктә эскелеккә ҡаршы көрәш "йәшел йылан" тоҙағына эләгеүсе һәр ғаилә менән айырым эш алып барыуҙан башланырға тейеш, тигән фекерҙә улар.

Шулай уҡ конкурстың кимәлен дә арттырыу күҙ уңында тотола. Халыҡты айыҡтырыу эше менән ауыл биләмәләре генә түгел, район хакимиәттәре лә шөғөлләнергә тейеш, ти ойоштороусылар. Социаль сир менән яфаланыусыларҙы дауалау, хәмерһеҙ тормошто пропагандалауға республика ҡаҙнаһынан ниндәйҙер күләмдә аҡса ла бүлеү ҡарала.