Сочи ҡалаһында үтәсәк Олимпия уйындары асылыр алдынан Зәйнәб Биишева исемендәге «Китап» нәшриәтендә Барый Ноғомановтың «Бәхетең һинең ҡулдарҙа» исемле китабы донъя күрҙе. Повесть Паралимпия уйындары еңеүсеһе Ирек Зариповҡа арналған.

Ирек 18 йәшендә ҡурҡыныс аварияға осрай, ауыр операция үткәргәндән һуң, уның ике аяғында ҡырҡалар. Әммә йәш егеттә йәшәргә теләк, дәрт ҙур була, ул актив рәүештә спорт менән шөғөлләнә башлай. «Мин илемә файҙалы кеше булырға тейешмен», - ти ул. Ирек маҡсатына ирешә. Төрлө ярыштарҙа урындар ала башлай, ә инде спортсының йондоҙло сәғәте 2010 йылда Ванкувер ҡалаһында үткән Ҡышҡы Паралимпия уйындарында һуға. Ирек Зарипов был уйындарҙа дүрт тапҡыр еңеүсе була. Ауыр тормош һынауҙарына бирешмәгән, ныҡышмал, сәмле егет күптәргә өлгө булырлыҡ.

Китап бигерәк тә үҫеп килеүсе быуынға файҙалы булмаҡсы.