Рәсәйҙең атҡаҙанған мәҙәниәт хеҙмәткәре, Салауат Юлаев исемендәге дәүләт премияһы лауреаты, композитор Салауат Низаметдиновтың һуңғы ижад емеше сәхнәгә сығарылды.

"Мин һине нисек яратам?!" тип исемләнгән тамашаның ҡуйыусы-режиссеры Рөстәм Ғәлиев. Әҫәрҙең музыкаль яҡтан биҙәлеше һәм декорацияһы ла төптән уйланылған. Ике бүлектән торған опера спектакле либретто жанрында ижад ителгән. Унда авторҙан тыш, донъяның билдәле композиторының әҫәрҙәре лә башҡарылды. Премьера сиктәрендә тамашасыларға алма таратылыуы ла үҙенсәлекле ижади алым һәм опера әҫәренең "Әҙәм менән Һауа" тарихына таянып ижад ителеүенә ишара. Күренекле композитор арабыҙҙан китһә лә, ул үҙенең әҫәрҙәрендә тамашасы күңлен ҡат-ҡат арбаясаҡ әле. Салауат Низаметдинов ижадын һөйөүселәр ошондай фекерҙә.