Мостай Кәрим исемендәге Милли йәштәр театрында Башҡорт асыҡ КВН лигаһының ярым финалы уйындары үтте.

Әҙәби миҙгелдең тәүге көнөндә Әбйәлил районынан «Тетрис», Ейәнсуранан «Бытбылдыҡ», Сибай ҡалаһынан «Еңмештәр», Башҡорт дәүләт университетының тарих факультетынан «Өтөр» КВН командалары һынау тотто. Һәр ваҡыттағыса, командаларҙың сығышы көнүҙәк мәсьәләләрҙе, борсоған темаларҙы яҡтыртыуға ҡоролғайны. Берәүҙәр тормоштағы ябай күренештәрҙе көлкөгә һабыштырһа, икенселәр донъяуи проблемаларҙы тәнҡитләне. Тамашасылар иһә һәр сығышты алҡышлап оҙатты. Шаяртыуҙар көндәлек тормошта тыуа ла инде, ти команда ағзалары.

Башҡорт асыҡ «Шаяндар һәм отҡорҙар» клубының киләһе ярым финалы 25 февралгә билдәләнгән. Сираттағыһында Стәрлетамаҡ ҡалаһынан «Страйк», Өфөнән «Хыялыйҙар» һәм «Кәкре сүкеш» КВН командалары, шулай уҡ Мәскәү ҡалаһынан «Хэйнешейшон» / Хәйnation / һынау тотасаҡ.