Шағирәләр Гөлнара Хәлфетдинова, Гөлназ Ҡотоева һәм прозаик Фәрзәнә Аҡбулатова Алания ҡалаһында үткән XV "Кибатек" әҙәбиәт сипозиумында ҡатнашты. Бөтә донъя әҙиптәрен берләштергән абруйлы йыйын быйыл "Әҙәбиәттә-тау" темаһына арналған. Яҡташтарыбыҙҙың шиғыр-хикәйәләре "Кюнсел санат" йәғни "Хәҙерге сәнғәт" әҙәби-мәҙәни журналында ла баҫылып сыҡҡан.

Гөлнара Хәлфетдинова Төркиәгә Урал тауҙарының бөйөклөгөн данлаған шиғырын алып бара. Тау образына элек тә мөрәжәғәт иткәнем бар ине, әммә симпозиум өсөн махсус рәүештә ижад итергә тура килде, ти йәш шағирә. Тәүҙә Гөлнара шиғырын төрөксәгә тәржемә иттереп йыйынды ойоштороусыларға ебәрә. Ике турҙы үткәндән һуң ғына улар Төркиәгә саҡырыу ала. Европа менән Азияны айырып ятҡан Урал тауҙары хаҡындағы шиғыр йылы ҡабул ителә.

Симпозиумда тау образы төрлөсә һынландырыла, мәҫәлән, күп төрки халыҡтарҙа Тәңре тауы бар, баҡтиһәң ҡырғыҙҙарҙың баш кейеме лә ошо тауҙы сағылдыра икән. Йыйында ҡатнашыусы ғалимдар, яҙыусылар тау образының әҙәбиәттәге, фольклорҙағы мәғәнәһе, фәлсәфәһе менән таныштыра.

Гөлнара Хәлфетдинова киләсәктә лә уҡыусыларҙы яңы ижад емештәре менән ҡыуандырырыға ниәтләй. "Кибатек" кеүек абруйлы симпозиумдарҙа ҡатнашыу, бөтә төрки донъяға билдәле яҙыусы-ғалимдар менән аралашыу, донъя күреү илһам өҫтәй, ти йәш шағирә.

Быйыл Гөлнара Хәлфетдинова Шәйехзада Бабич исемендәге йәштәр дәүләт премияһына лә тәҡдим ителгән. Төрки донъяға Урал тауҙарын данлаған йәш шағирәнең был наградаға ла лайыҡ буласағына өмөт ҙур.

Сығанаҡ: БСТ