Өфөлә профессиональ фоторәссамдар күргәҙмәһе асылды.

Берәүҙәр өсөн күргәҙмә тәжрибә уртаҡлашыу майҙаны булһа, икенселәргә ижади һәләтен үҫтереү мөмкинлеге. 

Сит илдәрҙе сағылдырған фотоһүрәттәр күргәҙмәнең сағыу биҙәгенә әйләнде. Төркиә, Испания, Италия илдәре тамашасы алдында төрлө төҫтәрҙә балҡыны. Тәү ҡарашҡа улар ябай ғына һүрәт кеүек күренһә лә, асылда бында оҫтаның тәрән фекере ята.

Биш йыл эсендә академияны меңгә яҡын кеше тамамлаған. Әммә күргәҙмәлә уларҙың бөтәһе лә ҡатнашмай. Бында 35 кешенең эше менән танышырға мөмкин. Фото сәнғәте туҡтауһыҙ эшләүҙе талап итә. Профессиональ кимәлгә күтәрелеү өсөн бик күп йылдар китә, тип билдәләй академия етәксеһе Владимир Подкользин.

Күргәҙмә 22 декабргә тиклем дауам итә. Ул иртәнге сәғәт 10-дан төнгө 10-ға тиклем эшләй. Инеү бушлай. Экспозиция берәүҙе лә битараф ҡалдырмай. Эштәргә ҡарап һоҡланырға ла, фекер тупларға ла мөмкин.

Оҫталар күҙлеге аша ябай ғына әйберҙәр ҙә үҙенсәлекле булып күренә. Улар өсөн иң мөһиме - ижади ҡараш. Академияның 5 йыллыҡ юбилейы ла күптәрҙең күңелендә сағыу күренеш булып уйылып ҡалды.

Сығанаҡ: Башҡортостан юлдаш телевидениеһы