Күптән түгел Мәжит Ғафури исемендәге Башҡорт дәүләт академия драма театры үҙенең 93-сө ижад миҙгелен асты. Ғәҙәттәгесә, яңы миҙгел асыуға театр премьера спектакле әҙерләне. Софоклдың “Эдип батша” трагедияһы буйынса ҡуйылған тамашаның режиссеры – сценарист һәм режиссер Искәндәр Рәүф улы Саҡаев, рәссамы – Түбәнге Новгородтан Борис Шлямин. Төп ролдә – Башҡортостандың һәм Рәсәйҙең халыҡ артисы, С.Юлаев ис. дәүләт премияһы лауреаты Хөрмәтулла Үтәшев.

Ижад миҙгеле асылыу уңайынан театр алдында ойошторолған байрам концертынан һуң спектакль ҡарарға йыйылғас, сәхнә биҙәлешенә тамашасы бер аҙ аптырап ҡалғандай булды. Бер сәхнәлә төп ваҡиғаларҙың һәм иҫтәлектәрҙең параллель рәүештә барыуы, күңелгә үтеп инерлек моң, маска кейгән персонаждар, ваҡиғалар үҫә барған һайын ярым-яланғас Сфинкстың сәхнә буйлап үрле-ҡырлы һикерә-һикерә йүгереүе, ниҙер һамаҡлауы, ҡабатлауҙар… - барыһы ла серле, тулҡынландырғыс…

Премьераға ҡарата һәр кемдең үҙ ҡарашы булғандыр. Кемдер күргәненән ҡәнәғәт ҡалһа, икенселәр уйҙар шауҡымына бирелде. Йөҙ ҡат ишеткәнсе, бер ҡат барып ҡарау отошло, ти бит халыҡ. Һеҙ ҙә премьера спектаклен килеп ҡарай алаһығыҙ. Сираттағы ҡуйылышы – 9 октябрь.