"Киске Өфө" гәзитенең баш мөхәррире, билдәле журналист, БР-ның атҡаҙанған мәҙәниәт хеҙмәткәре, Башҡортостан Хөкүмәтенең Шәһит Хоҙайбирҙин исемендәге премияһы, Рәми Ғарипов исемендәге премия лауреаты Гөлфиә Янбаеваның әле ошо көндәрҙә генә Зәйнәб Биишева исемендәге "Китап" нәшриәтендә донъя күргән китабының исеме "Елле фекерҙәр елгә осмаһын" тип атала. Исеменән үк күренеүенсә, китапҡа авторҙың йәшәйешебеҙ, донъя, заман, тарих, дин, шәхес, милләт яҙмышы хаҡында ҡыҙыҡлы күҙәтеүҙәре, көтөлмәгән һығымталары, ҡанатлы һүҙҙәре, автор үҙе баш һүҙҙә әйткәнсә, йөҙ кәлимә фекере тупланған. Фекерҙәр, күҙәтеүҙәр үҙенсәлекле рәүештә дүрт өлөшкә бүленгән, улар: "Елле фекерҙәр елгә осмаһын", "Журналист һабаҡтары", "Матурлыҡ тураһында кәлимәләр", "Үҙем тураһында ҡайһы бер кәлимәләр".