Х.Әхмәтов исемендәге Башҡорт дәүләт филармонияһында «Йылдың иң яҡшы башҡорт китабы» VIII республика конкурсы еңеүселәрен тәбрикләү тантанаһы үтте. Бөтәһе 42 муниципаль китапхана системаһынан 116 проект тәҡдим ителгән.

Конкурсҡа видеороликтар тәүге тапҡыр ижади эш кеүек тәҡдим ителде (буктрейлерҙар — китап тураһында һөйләү, был китапты әле уҡымағандарҙы ҡыҙыҡһындырыу, китапты яратыуыңды белдереү ысулы).

Еңеүселәрҙе өс номинацияла билдәләйәсәктәр: «Мөхәббәт, ғаилә, тоғролоҡ тураһында иң яҡшы китап», «Башҡортостан тәбиғәте тураһында иң яҡшы китап», «Бала саҡта иң яратҡан китап».

Шулай уҡ махсус дипломдар тапшырыласаҡ: «БР-ҙа иң уҡымлы китап» дипломына китаптары ҙур популярлыҡ яулаған өс автор – Марат Муллаҡаев, Людмила Чупахина, Дамир Шәрәфетдинов лайыҡ; «Йыл асышы» дипломын йәш яҙыусы, журналист Айгиз Баймөхәмәтов «Ҡалдырма, әсәй» китабы өсөн алды.

Сараны ойоштороусылар – БР Мәҙәниәт министрлығы һәм Әхмәт-Зәки Вәлиди исемендәге Милли китапхана.