14 декабрь - театр сәхнәһендә Башҡортостандың халыҡ артисткаһы Светлана Хәкимованың юбилей бенефисы үтә.

“ Йыр - ҡанатым, сәхнә - асылым…” тип исемләнгән кисәлә юбилярҙың ижадташтары, республиканың театр йәмәғәтселеге, күренекле сәхнә оҫталары ҡатнаша. Актрисаның юбилей байрамына күп кенә ҡунаҡтар килеүе лә көтөлә.

Юбилей бенефисы, исеменән үк күренеүенсә, йыр-моңға бай булмаҡсы. Ә иң мөһиме - Светлана Хәкимова уҙған миҙгелдәрҙә башҡарған сәхнә образдары яңынан “тереләсәк”, бөгөнгөләре лә уны “ҡотларға киләсәк”.

“Мин тамашасыма, сәхнәләштәремә, дуҫтарыма һәм, әлбиттә, яҡындарыма был көндө байрам бүләк иткем килә”,- ти актриса.

14 декабрҙә тамашасыны ысын мәғәнәһендә бай һәм сағыу программа көтә.