30 октябрь Х.Әхмәтов исемендәге Башҡорт дәүләт филармонияһында Башҡортостандың атҡаҙанған артисткаһы Миңзифа ИСКУЖИНА һәм Халыҡ-ара конкурстары лауреаты Марсель ҠОТОЕВТЫҢ “Күк Ирәндек буйында” исемле концерты буласаҡ. Тамашаның беренсе бүлеге башҡорт халыҡ йырҙарынан- оҙон көйҙәр, таҡмаҡтарҙан, икенсеһе - эстрада йырҙарынан торасаҡ. Концертта йәнтөйәк, тыуған ил, Ватан, һөйөү темаларына ҡағылышлы йырҙар яңғыраясаҡ. Йырсыларҙың сығышын БР-ың халыҡ ҡоралдары милли оркестры оҙатып барасаҡ. 

Миңзифа Исҡужинаның күңелен йыр-моң бала-саҡтан әсир итә. Йырсы булыу теләге менән янған бәләкәй ҡыҙҙың хыялы тормошҡа аша. Бөгөн ул - Башҡортостан Республикаһының атҡаҙанған артисткаһы, популяр “Далан” фольклор-эстрада төркөмө солисткаһы.

Билдәле йырсы Өфө сәнғәт училищеһында, унан һуң Өфө дәүләт сәнғәт академияһында белем ала. Студент йылдарында уҡ төрлө концерттарҙа ҡатнашып йөрөй. Профессиональ белем алғас, Миңзифа Искужина Башҡорт дәүләт филармонияһына эшкә килә. Ун йылдан ашыу мәҙәни усаҡта ижад итә. Моңло тауышы, халыҡсан йырҙары менән тамашасының күңелен әсир итә ул.

Тамашаның икенсе сағыу йондоҙо Марсель ҠОТОЕВ һәләтле йәш артистарҙың береһе. Х.Әхмәтов исемендәге Башҡорт дәүләт филармонияһында “Далан” “Каруанһарай”, “Йәдкәр” фольклор-эстрада төркөмөндәрендә эшләй. 

Коллективтар менән репсублика ауыл-ҡалаларында гастроль концерттары менән сығыш яһап йөрөй. Марсель Ҡотоев “Урал моңо” халыҡ-ара конкурсында Гран-при, “Гәлсәр һандуғас” телевизион фестивале лауреаты исемдәренә лайыҡ. Юғары башҡарыу оҫталығына эйә булған йырсының репертуары башҡорт халыҡ, эстрада йырҙарынан тора. 

Шулай итеп, башҡорт эстрадаһының һандуғастары Миңзифа ИСҠУЖИНА һәм Марсель ҠОТОЕВ тәҡдим иткән яратҡан йырҙарға бай “Күк Ирәндек буйында” исемле күркәм тамашаға рәхим итегеҙ, дуҫтар!