Мәшһүр композитор Хөсәйен Әхмәтов башҡорт музыка сәнғәтен үҫтереүгә һалған көсө баһалап бөткөһөҙ. Бөйөк композитор музыка сәнғәтенең бар тармаҡтарында тиерлек әүҙем ижад итә. Һанай китһәң уның ижади даирәһе икһеҙ-сикһеҙ. Нотаға һалынған һәм эшкәртелгән башҡорт халыҡ көйҙәре, кантаталар, либретталар, эстрада йырҙары, спектаклдәр өсөн яҙылған көйҙәр... Улар араһында “Тау бөркөтө” балеты, “Замандаштар” либреттаһы, “Маҡтау йыры” кантатаһы, “Башҡорт йыры” сюиталары, Б.Бикбайҙың “Салауат Юлаев”, М.Кәримдең “Ай тотолған төндә”, И.Абдуллиндың “Бер мөхәббәт яҙмышы” исемле спектаклдәргә ижад иткән көйҙәр тамашасы тарафынан йылы ҡабул ителде. 

Танылған композиторҙың ижады башҡорт профессиональ музыка үҫешендә мөһим этап булып тора. 18 баллада һәм башҡорт шағирҙарының һүҙҙәренә яҙылған “Ғаләм” исемле вокал циклдары, 200 ашыу йыр һәм романстар башҡорт вокал музыкаһының үҫеш кимәлен билдәләүсе әҫәрҙәр була. 

Хөсәйен Әхмәтовтың мәҙәниәт һәм сәнғәт өлкәһендә күрһәткән ҡаҙаныштары Хөкүмәт тарафынан юғары баһалана. Ул РСФСР-ҙың атҡаҙанған сәнғәт эшмәкәре, РСФСР-ҙың халыҡ артисы. Бөйөк сәнғәт әһеленең исемен мәңгелләштереү ниәтендә республиканың төп мәҙәни усаҡтарының береһе Башҡорт дәүләт филармонияһына композиторҙың исеме бирелде. 

Шулай итеп, Х.Әхмәтов исемен йөрөткән йыр-моң усағы, Башҡорт дәүләт филармонияһы, бөйөк композиторҙың 100 йыллығына арналған тамашаға саҡыра.

Фәҡәт Хөсәйен Әхмәтовтың музыка әҫәрҙәренән торған кисәгә рәхим итегеҙ, дуҫтар!