25 октябрь З.Исмәғилев исемендәге Өфө дәүләт сәнғәт академияһы 45 йыллыҡ юбилейын билдәләй. Шуға арнап Ф.И.Шаляпин исемендәге Концерт залында академия уҡытыусылары һәм уҡыусылары ҡатнашлығында байрам концерты уҙа.

Бөгөнгө көндә сәнғәт академияһында 4 факультет, 25 кафедра эшләй, буласаҡ сәхнә оҫталарын 20 яҡын йүнәлеш буйынса әҙерләйҙәр. Сығарылыш уҡыусыларының 95 проценты республиканың мәҙәниәт усаҡтарында тир түгә.

Уҡыу йортон ҡотларға билдәле артистар – Рөстәм Шәйхетдинов (фортепиано), Марат Шәрипов (вокал), Илһам Вәлиев (вокал), Инна Фоменко (флейта), Шәүрә Сәғитова (фортепиано), Ирина Куравина (думбыра), Марсель Вәхитов (ҡурай), Руслан Вәлиев (кларнет), Гөлнара Вәлиева, Алена Завьялова (вокал) киләсәк. Шулай уҡ академияның коллективтары ла үҙҙәренең сығыштары менән тамашаны йәмләйәсәк.