Мәскәүҙең танылған «Май» циркы династияһы, йәғни Майхровскийҙар ғаиләһе сағыу тамаша менән илдең ҙур ҡалалары буйлап гастролдә йөрөй. Ниһайәт, улар республикабыҙҙың баш ҡалаһында. Рәсәй дәүләт циркы компанияһы үҙ программаһын билдәле актер һәм клоун Юрий Никулиндың тыуыуына 92 йыл тулыуға бағышлаған. «Аҡ айыуҙар һәм пингвиндар - мөғжизә илендә» тип аталған тамаша ҡала халҡын 12 ғинуарға тиклем һөйөндөрәсәк.

Лоло, Цаца, Боня, Люба, Сеня һәм башҡалар - цирк артистарының һәр береһенең ҡушаматын хайуандар өйрәтеүсе Наталья Майхровская хәтерендә тота. Ханым уларҙы холоҡтары буйынса ла таный. Тамашасыға өйрәнһен өсөн пингвиндарҙы көн дә тиерлек аренаға сығарырға кәрәк.

Өфө циркында матбуғат саралары вәкилдәре лә үҙҙәрен хайуандарҙы өйрәтеүсе ролендә һынап ҡараны. Арена артистарынан йондоҙ яһау өсөн күпме көс талап ителеүен хәбәрселәр үҙ иңендә татыны.

Плюша ҡушаматлы моржға 4 йәш тулыуға ҡарамаҫтан, ул аренала йыш сығыш яһай. Тәүге тапҡыр тамашасы алдына 2 йәшендә сыҡҡан. Төрлө күнекмәләрҙе тиҙ отоп алһын өсөн уны тәмлекәстәр менән һыйлап тороу кәрәк. Балыҡты ул көнөнә 15-тән 20 килограмға яҡын ашай ала.

Аҡ айыуҙар, тутыйғоштар һәм маймылдарҙың сығыштары берәүҙе лә битараф ҡалдырмаясаҡ. Өфө дәүләт циркында мөғжизә илен 12 ғинуарға тиклем күҙәтергә мөмкин.

Сығанаҡ: БЮТ сайтынан