«Маҡтымһылыу, Әбләй һәм Ҡара юрға» мюзиклы ғәжәйеп үҙенсәлекле сәхнә күренеше: унда башҡорт халыҡ йолалары менән хәҙерге заман драматургияһы, музыка, йыр, хореография сәнғәтенең традициялары бер- береһенә эҙмә-эҙлекле үрелеп бара.

Спектаклдә милли колорит бик сағыу бирелә. Уның идея композицияһы башҡорт халыҡ эпосы “Ҡара юрға”ның сюжетына нигеҙләнгән. Мюзиклда әҙәм йәнле хайуан - Ҡара юрғаның кешеләрҙең бәхете хаҡына ҡылған изгелектәре һүрәтләнә, бында героик әкиәт, социаль-көнкүреш мотивтары, героизм темаһы, хыянат, кешеләр араһындағы мөнәсәбәттәр асыҡ күренә.

Пьесаның йөкмәткеһе сәхнәлә кәүҙәләнеш тапҡанда мифик әҫәрҙең сюжет линияһы менән башҡорттарҙың боронғо фәлсәфәүи-гуманистик ҡараштары режиссер тарафынан бик нескә һәм ҙур оҫталыҡ менән кәүҙәләндерелә һәм шуға ла спектакль “сәнғәттә дөйөм кешелек ҡиммәттәре” темаһына ауаздаш.

Театрҙың сираттағы премьераһы сағыу һәм романтик, күңелгә үтеп инерлек, моңло спектакль. Тамашасы уны, башынан аҙағынса бер тында ҡарап, еңел рәхәтлек тоясаҡ. “Тере” тауыштар, актерҙарҙың оҫта уйыны, зауыҡлы сәхнә костюмдары, заманса биҙәлеш - быларҙың барыһы ла тамашасыға онотолмаҫ тәьҫораттар бүләк итәсәк.

Ни генә тимә, «Маҡтымһылыу, Әбләй һәм Ҡара юрға» мюзиклы ҙур күләмле һәм сағыу сәхнә әҫәре!