Бөгөн, 6 декабрь, Мостай Кәрим исемендәге Милли йәштәр театры тамашасыны премьера менән ҡыуандырмаҡсы. «Яуҙы еңгән мөхәббәт» - ике бүлектән торған лирик комедия.Ҡуйыусы режиссеры – БР-ҙың атҡаҙанған сәнғәт эшмәкәре, Ш.Бабич исемендәге йәштәр премияһы лауреаты Мөсәлим Кулбаев, рәссамы – Юлиә Ғиләжева, музыкаль яҡтан биҙәүсе – БР-ҙың атҡаҙанған сәнғәт эшмәкәре Ришат Сәғитов. Әйтергә кәрәк, был спектакль Республика Президентының театр коллективтарының иң әһәмиәтле ижады проекттарын тормошҡа ашырыу өсөн бирелгән грантына лайыҡ булды.

Пьеса Мостай Кәримдең төрлө йылдарҙа яҙылған әҫәрҙәре - «Ауыл адвокаттары» повесы һәм «Туй дауам итә» пьесаһына таянып яҙылған.

Спектакль башҡорт һәм рус телдәрендә барасаҡ, шуға ла унда театрҙың ике труппаһы ла йәлеп ителгән.

Башҡорт ауылында гөрләп икә йәш йөрәк Заһир һәм Гөлшаттың туйы бара. Әммә һуғыш сыҡҡан тигән ҡурҡыныс хәбәрҙән һуң туй туҡтап ҡала. Тик йөрәктәрҙә ҡабынған оло һөйөүҙе һуғыш тип аталған ҡурҡыныс үлтереш һүндерә алмай, Заһир менән Гөлшаттың мөхәббәте был ҡурҡыныс мәхшәрҙе еңәсәк һәм туйҙың дауамы мотлаҡ буласаҡ...