Мәскәү башҡорттары өсөн ул көтөп алынған матур сараға әүерелеп килә. Башҡортостандан алыҫта туған телдә аралашыу һирәк күренешкә әйләнеп бара, тип әсенеп һөйләй ата-әсәләр.

Яңы йылдан балалар ғына түгел, ололар ҙа ниндәйҙер мөғжизә көтөп өйрәнгән. Мәскәү башҡорттары өсөн был байрам, ысынлап та, тылсым көсөнә эйә. Үҙебеҙҙе туған Башҡортостаныбыҙға әйләнеп ҡайтҡандай тоябыҙ, балаларыбыҙға телебеҙҙе онотмаҫҡа ярҙам итә, ти яҡташтарыбыҙ.

Башҡортостандың Мәскәүҙәге Даими вәкиллегендә Яңы йыл икенсе тапҡыр уҙғарылды. Үткән йылдан айырмалы рәүештә, быйыл байрамға профессиональ актерҙар саҡырылды. Рәсәй театр сәнғәте университеты аспиранттары балаларға күңелле тамаша бүләк итте.

Ниндәй Яңы йыл Ҡыш бабайһыҙ үтһен? Ҡарһылыуын етәкләп, алыҫ Башҡортостандан килгән Ҡар бабай балаларҙың башҡорт телендә шиғыр һөйләүен ишетеп һөйөндө.

Сығанаҡ: БЮТ телеканалы