21 февраль, Халыҡ-ара тыуған тел көнөндә, Әхмәтзәки Вәлиди исемендәге Милли китапханала филология фәндәре докторы, билдәле сәсәниә, йәмәғәт эшмәкәре Розалия Солтангәрәеваның «Башҡорт сәсән мәктәбе» исемле китабының исем туйы үтте.

Баҫмала 1996 йылдан алып сәсәнлек хаҡында аналитик мәҡәләләр урын алған. Шулай уҡ халыҡ, ил, телебеҙгә ҡағылған фәлсәфәүи темалар ҙа күтәрелә китапта. Розалия Солтангәрәева әйтеүенсә, был әсбаптың маҡсаты – башҡорт сәсәнлек мәктәбен тергеҙеү, яңы көстәр йәлеп итеү.

Кисәлә баш ҡала мәктәптәренең башҡорт теле һәм әҙәбиәте уҡытыусылары, Мифтахетдин Аҡмулла исемендәге педагогия университеты студенттары ҡатнашты. Буласаҡ тел белгестәре «Урал батыр» эпосынан өҙөк ятланылар.

Сәсәниә башҡарыуында «Уйлан, балам» (ҡаҙаҡ йыры) һәм «Изге ер» ҡобайыры сараға ҡабатланмаҫ йәм өҫтәне.

Кисә барышында традицион һәм виртуаль күргәҙмә эшләне.