Китап данлыҡлы уҡыу йортоноң 70 йыллыҡ юбилейы айҡанлы әҙерләнә.

Бөйөк Ватан һуғышы йылдарында яугирҙарҙың балалары өсөн асылған белем усағы тәүҙә 9-сы мәктәп тип йөрөтөлә, ә1956-сы йылда ул 1-се мәктәп-интернат тип үҙгәртелә. Үткән быуат аҙағында учреждение гимназия статусын ала, 19 йыл элек иһә тарихи учреждениеға ошо мәктәпте тамамлаусы бөйөк шағир Рәми Ғариповтың исеме бирелә. Белем усағы меңдәрсә балаға төплө белем, тәрбиә биреп, оло тормош юлына оҙата, кадрҙар әҙерләүсе усаҡҡа әйләнә.

"Башҡортостан энциклопедияһы" ғилми нәшриәте белгестәре әйтеүенсә, донъя күрәсәк баҫма белем усағының бай тарихын сағылдырырға тейеш. Әле махсус эшсе төркөм төҙөлгән, сығарылыш уҡыусылары, уҡытыусылар, хеҙмәткәрҙәр хаҡында мәғлүмәттәр туплана. Ошо маҡсатта матбуғат баҫмаларына, сайттарға иғландар бирелгән. Яҙмышы тарихи белем усағы менән бәйле кешеләргә анкета ебәреү талап ителә. Мәғлүмәттәрҙе гимназия-интернаттың йәки "Башҡортостан энциклопедияһы"ның сайттарына, социаль селтәрҙәрҙәге махсус биттәргә ебәрергә мөмкин. Эшсе төркөм ағзалары барыһын да әүҙемерәк булырға саҡыра, сөнки һәр белем усағының тарихын уның күренекле шәхестәре билдәләй.