4 февраль Дүртөйлө районында Башҡортостандың халыҡ шағиры Назар Нәжмигә арналған хәтер кисәһе үтте. Шағирҙы хөрмәтләп иҫкә алырға Өфө ҡунаҡтары – Яҙыусылар союзы башлығы вазифаһын башҡарыусы Фәрзәнә Ғөбәйҙуллина, «Өмөт» гәзитенең баш мөхәррире Рәдис Ноғоманов, музыкант Радик Динәхмәтов һәм әҙиптең ижадын хөрмәт итеүселәр йыйылды. Шағирҙың һәйкәленә сәскәләр һалынды, ҡунаҡтар уның йорт-музейында булды.

Райондың мәҙәниәт йортонда Назар Нәжми исемендәге әҙәби премия тапшырыу тантанаһы үтте. Быйылғы йылда мәртәбәле исем С.Юлаев исемендәге Дәүләт премияһы лауреаты Ирек Кинйәбулатовҡа һәм Башҡортостандың халыҡ шағиры Ҡәҙим Аралбаевҡа тапшырылды. Күренекле шағирҙарыбыҙ Назар Нәжмиҙең тормош һәм ижад юлына бағышланған фотоальбом авторҙары.

Кисә райондың үҙешмәкәр коллективтары ҡатнашлығында йыр, бейеү менән үрелеп барҙы, шулай уҡ халыҡ шағирының шиғырҙары, уның һүҙҙәренә яҙылған йырҙар яңғыраны.