Баш ҡалала мөмкинлектәре сикләнгән балаларҙың "Таланттар йондоҙлоғо" дүртенсе асыҡ республика конкурсы үтте.

Баймаҡ районынан Әлиә Атанова конкурста интернет селтәрендә иң күп тауыш йыйыусы булараҡ билдәләнде. Алыҫ араға юл йөрөү ауырға тура килгәс, ул конкурста скайп аша ҡатнашты. Тәүгеһендә йыр, икенсе турҙа шағирә Динә Талхинаның шиғырын тәҡдим итте.

Конкурс 4-се тапҡыр уҙғарылды. Сираттағыһында республика район-ҡалаларынан 300-ләп бала ҡатнашты. Уларҙың 5 тиҫтәһе финалға сыҡты.

"Таланттар йондоҙлоғо" конкурсы еңеүселәре төрлө номинациялар буйынса бүләкләнде. Ә Гран-приға Бәләбәй районынан Дарья Мордвинова лайыҡ булды. Рус халыҡ йырҙарын башҡарырға яратҡан ҡыҙ киләсәккә яҡты өмөттәр менән йәшәй.