Бөгөн Башҡортостандың халыҡ шағиры, Салауат Юлаев исемендәге Дәүләт премияһы лауреаты Тимер Йосоповтың 75 йәшенә арналған байрам тамашаһы үтә.

Тимер Йосопов Дыуан районының Әпсәләм ауылында тыуып үҫкән. Башҡорт дәүләт университетын тамамлағандан һуң мәктәптә, редакцияла, Яҙыусылар союзында эшләй. Мәскәүҙә Юғары әҙәби курстар тамамлай.

Тимер Йосоповтың «Икмәк еҫе», «Йылдар сылбыры», «Алтын туҙан», «Усаҡ яна», «Хәтеремдең тере ҡуҙҙары», «Ташҡын», «Олатайҙар юлы», «Ҡая өҫтөндә уйланыу» тигән шиғри йыйынтыҡтарын уҡыусылар ихлас ҡабул итте.

Шағир ижадының тематик даирәһе ғәйәт киң. Донъяға ул берсә сабый эскерһеҙлеге, икенсе осраҡта тай-тулаҡтай йәш-елкенсәк ашҡыныуы, өсөнсө урында күпте күргән ил ағаһының уйсанлығы аша баға. Әммә һәр ваҡыт үҙ асылына тоғро ҡала.

«Беште ер еләккәйҙәре» китабы өсөн республиканың иң ҙур премияһына лайыҡ булды.