Илебеҙҙең бөтә кескәйҙәре яратҡан «Тыныс йоҡо, кескәйҙәр!» тапшырыуы быйыл үҙенең 50 йыллыҡ юбилейын билдәләй. Ошо айҡанлы программаның геройҙары һәм артистары илебеҙҙең төрлө ҡалаларында сығыш яһайҙар. Беҙҙең Өфөбөҙ ҙә был матур тамашанан ситтә ҡалманы – 6 октябрь Ҡала мәҙәниәт һарайында ҙур байрам концерты уҙҙы. 

Яратҡан актерҙарыбыҙ журналистар менән дә осрашты. Пресс-конференцияла «Класс» телекомпания вәкиле Зайцева Л.И. һәм актерҙар Голубенцова Н.А., Капатов И.А. ҡатнашты. Людмила Ивановна был концерттың ВТБ Банкы ярҙамында үтеүе хаҡында хәбәр итте. Уның фекеренсә, программаның «оҙаҡ йәшәүенең» сере шунда: уны бик яраталар һәм көтөп алалар.

Журналистар бигерәк тә Капатов Игорь Альбертович менән ҡыҙыҡһындылар. Был юҡҡа түгел, сөнки ул Башҡортостандың халыҡ артисы, оҙаҡ йылдар Ҡурсаҡ театрында эшләне. Игорь Альберт улы йәнә Өфөлә булыуына сикһеҙ шат булыуын билдәләне.

Рәсәйҙең атҡаҙанған артисткаһы Голубенцова Наталья Александровна программа хаҡында, Хрюша һәм Степашка роле тормошта ярҙам итәме-юҡмы икәнен ҡыҙыҡлы итеп һөйләне. Наталья Александровна коллективта йылы атмосфера хөкөм һөрә, шуға тапшырыуыбыҙ яҡшы тойғолар бүләк итә, тине.

Осрашыуҙан һуң сағыу концерт уҙҙы, кескәйҙәр рәхәтләнеп бейенеләр, йырланылар, яратҡан геройҙары менән осраштылар, хатта фотоға төштөләр!