Мәскәү студенттарының "Алтын ай" бейеү ансамбле концерт программаһы менән тыуған яғында сығыш яһаны. Ситтә йәшәүҙәренә ҡарамаҫтан, милләттәштәребеҙ үҙ рухына тоғро ҡала. Быға тиклем коллектив Рәсәйҙең төрлө төбәктәрендә сығыш яһаған, сират Өфөгә лә етте. Тамашасылар менән осрашыуға егеттәр һәм ҡыҙҙар ентекле әҙерләнгән. Коллективты ойоштороусы Нияз Байегетов үҙе лә башҡорт халыҡ бейеүҙәренә ғашиҡ. Ваҡытында ул Фәйзи Ғәскәров исемендәге Башҡорт дәүләт академия халыҡ бейеүҙәре ансамблендә лә сығыш яһаған. Илебеҙҙең баш ҡалаһында ул башҡорт мәҙәниәтенә битараф булмаусы йәштәрҙе һәм бәләкәстәрҙе лә бейеү оҫталығына өйрәтә.

Мәскәү бейеүселәренең сығышы тамашасы күңеленә хуш килде. Концерт программаһындағы бейеүҙәрҙең тарихына ла байҡау яһалды. Өфөләр дәртле бейеүҙәр башҡарыусы йәштәрҙең алыҫ араларҙы яҡынайтып йәнә ҡайтып төшөүен көтөп ҡала.