Кисә, 23 ғинуар, Әхмәтзәки Вәлиди исемендәге Милли китапханала РСФСР-ҙың атҡаҙанған мәҙәниәт хеҙмәткәре, С.Юлаев исемендәге Дәүләт премияһы лауреаты, «Кинйә» романы авторы Ғәли Ибраһимовтың тыуыуына 95 йыл тулыу айҡанлы хәтер кисәһе үтте. Сараны китапхананың башҡорт әҙәбиәте һәм тыуған яҡты өйрәнеү бүлеге хеҙмәткәрҙәре ойошторҙо. Кисәлә БР Яҙыусылар союзы идараһы рәйесе вазифаһын башҡарыусы Фәрзәнә Ғөбәйҙуллина, Башҡортостандың халыҡ яҙыусыһы Ноғман Мусин, Башҡортостандың халыҡ шағиры Ҡәҙим Аралбаев, яҙыусы Рәшит Низамов, фән эшмәкәрҙәре Зәки Әлибаев, Гөлфирә Гәрәева, шәхестең ҡыҙы Һөйөклө Ибраһимова һәм М.Аҡмулла исемендәге БДПУ студенттары ҡатнашты.

Филология фәндәре кандидаты Зәки Әлибаев һәм филология фәндәре докторы Гөлфирә Гәрәева Ғәле Ибраһимовтың ижады хаҡында йөкмәткеле итеп сығыш яһанылар, бигерәк тә «Кинйә» романының идея-тематикаһына, йөкмәткеһенә оҙайлы туҡталдылар. Яҙыусы Ноғман Мусин Ғәли Ғизетдин улының яуаплы кеше булыуын билдәләһә, Ҡәҙим Аралбаев уның иғтибарлы һәм ихтирамлы булыуын һыҙыҡ өҫтөнә алды. «Атайым баҫалҡы, тыныс, йомарт кеше булды. Яҙған ижад емештәре – уның күңел талабы ине», - Һөйөклө Ибраһимова атаһына шундай баһа бирҙе.

Кисә барышында яҙыусының тормош һәм ижад юлына бағышланған виртуаль күргәҙмә эшләне.