«Йәйҙең өс аҙнаһы» сериалының режиссеры Руслан Юлтаев әйтеүенсә, фильм тиҫтәгә яҡын сериянан тора. Әле уның ете серияһы төшөрөлгән.

Һуңғы нөктәләрҙең береһе - Өфө тимер юл вокзалы. Бында төп геройҙарҙың поезд менән Анапа ҡалаһына ял итергә барыуы һүрәтләнә. Фильм 1 июлдә төшөрөлә башлаған. Төп ролдәрҙе «Күңелле йәшәйбеҙ» ял һәм күңел асыу тапшырыуында ҡатнашҡан Стәрлетамаҡ драма театры артистары уйнай. Артистар әйтеүенсә, фильмда төшөү күп ваҡытты ала. Шуға күрә уларға ҡайһы бер серияларҙы гастролдәр ваҡытында, эш араһында ла төшөрөргә тура килгән.

«Йәйҙең өс аҙнаһы» - мелодрама жанрында. Сериал балалар йортонда үҫкән Әлиә исемле ҡыҙҙың тормошон һүрәтләй. Ул бала саҡтан атаһының тере икәнен белеп үҫә һәм уны эҙләп табыу тураһында хыяллана. Картина ташландыҡ балалар, мөхәббәт, ғаилә ҡиммәттәре кеүек төшөнсәләргә нигеҙләнеп ижад ителгән. Авторҙар әлеге сериал менән башҡорт киноһын үҫтереүгә үҙ өлөшөн индерергә теләй.

Сығанаҡ: Башҡортостан юлдаш телевидениеһы сайтынан