Мәғлүм булыуынса, 5 һәм 6 февралдә Стәрлетамаҡ дәүләт театр-концерт берләшмәһендә Мәҙәниәт йылын асыу уңайынан күркәм саралар уҙҙы.

Баязит Бикбайҙың “Ҡоҙаса” музыкаль комедияһы сәхнәлә оҙаҡ ҡына уйналыуына ҡарамаҫтан, һаман да халыҡтың яратҡан спектаклдәренең береһе булып ҡала. Шуға күрә Мәҙәниәт йылын асыу уңайына бағышлап тап ошо спектаклдең ҡуйылыуы сараға тағы ла бер мәртәбә өҫтәне.

Шаршау асылыр алдынан бәрләшмә директоры Ринат Исҡужа улы Ишмуллин актерҙарҙы, производство-техник һәм хәүефһеҙлек хеҙмәте эшселәрен Маҡтау грамоталары менән бүләкләне. Шулай уҡ, һүҙ ыңғайында, 2013 йыл йомғаҡтарын барланы һәм киләсәктә лә тамашасыларҙы бергә ҡалырға саҡырҙы.

Әйткәндәй, “Ҡоҙаса” бер тында ҡаралды. Физәлиә һәм Илһам Рәхимовтарҙың, Илфир Баймырҙиндың, Резеда Әмәкәсованың, Гилюс Минһазовтың һәм башҡа актерҙарҙың килештереп уйнауына һоҡланып туйырлыҡмы ни?! Эйе, Стәрлетамаҡ башҡорт драма актерҙарының оҫталығы һәм таланты бер нәмә менән дә сағыштырһыҙ. Афарин!

Ғөмүмән, күңелдәр асылып, йөрәктәр ял алып ҡайтты. Бына шулай, Мәҙәниәт йылы старт алды. Үтәләһе пландар күп, идеялар ташып бара. Форсаттан файҙаланып, эшләп кенә өлгөрәйек!

Автор: Гөлдәр СОБХАНҒОЛОВА.