Хәрби-тарихи патриотик клуб ағзалары 1812 йылғы Ватан һуғышында еңеүгә 200 йыл тулыу һәм йылҡы йылы уңайынан аттарға эйәр һалып ҡараны.

Һыбай килеш уҡтан атыу, ҡылыс менән эш итеү – «Төньяҡ амурҙары» өсөн тәүгә түгел. Шулай ҙа ҡышҡы һыуыҡта туғайҙағы көрт буйлап ярышыу мөмкинлеге яугирҙарға һирәк эләгә. Клубтың күптәнге ағзаһы Юлай Ғәлиуллин ат өҫтөндә сабып барған килеш шартлы сәпкә тейҙереү алымын өйрәнә. Ләкин ҡышҡы ауыр кейемдә моратыңа ирешеү өсөн тырышырға тура килә. Уның әйтеүенсә, улар бөгөнгө юртаҡтарҙы беренсегә күрә. Ә өйрәтелгән башҡорт аттарында күнекмә үткәреүе күпкә еңелерәк, ти ул.

«Төньяҡ амурҙары» клубы 1812 йылғы һуғышҡа һәм боронғо башҡорттар тормошона арналған сарала даими ҡатнаша. Улар йыл һайын Бородино яланында үткәрелгән хәрби-тарихи тергеҙеү күнекмәләрендә башҡорт ғәскәре исеменән сығыш яһай. Быйыл клуб ағзалары Францияның Реймс ҡалаһында үтәсәк «Европаны Наполеон диктатынан азат итеүҙе иҫкә алыу» байрамына барырға ниәтләй. Әле күләмле сараға әҙерлек бара. Кейемдәр, аттар барлана.

Әйткәндәй, хәрби костюмдар ҙа, аттар өсөн кәрәк-яраҡтар ҙа башлыса клуб ағзалары ҡулы менән эшләнгән. Ҡайһы бер ҡорамалдар ауылдарҙағы аҡһаҡалдарҙан, музейҙарҙан алынған. «Төньяҡ амурҙарына» ҡушылырға теләүселәргә һәр саҡ ишек асыҡ. Хәрби-тарихи патриотик клуб булараҡ, беҙ яңы ағзаларға кейем тегергә һәм, әлбиттә, ир-егеттең уң ҡанаты - ат менән эш итергә лә өйрәтәбеҙ, ти клуб ағзалары.

Сығанаҡ: БЮТ сайтынан