Өфөлә Башҡортостандың халыҡ артисы, Мостай Кәрим исемендәге Милли йәштәр театры актрисаһы Вәкилә Ҡалмантаева вафат булды. Уға 72 йәш ине.

Вәкилә Ғатаулла ҡыҙы Ҡалмантаева 1948 йылдың 7 ноябрендә Чкалов (Ырымбур) өлкәһе Үрге Ильяс ауылында тыуған. Өфө сәнғәт училищеһын, Башҡорт дәүләт университетын тамамлаған. 1970 йылдан – Салауат, Сибай драма театрҙарында, Өфө «Нур» татар театрында, 2002 йылдан Милли йәштәр театрында эшләгән.

Театр белгестәре билдәләүенсә, Вәкилә Ҡалмантаеваның ижадына жанр төрлөлөгө хас, ул сатирик, эксцентрик, фольклор, лирик-драматик ролдәрҙе башҡара. Мәҫәлән, Салауат драма театрында – Ҡарлуғас (Б.Бикбайҙың «Ҡарлуғас» драмаһы); Сибай драма театрында — Ғәлимә (М.Ғафуриҙың «Ҡара йөҙҙәр» повесы буйынса), леди Мильфорд (Ф.Шиллерҙың «Мәкер һәм мөхәббәт»), Эльвира (Мольерҙың «Дон Жуан»); «Нур» театрында — Ания (Т.Миңнуллиндың «Ай булмаһа, йондоҙ бар»); Милли йәштәр театрында — Әсә (Ф.Бүләковтың «Дала ҡиссаһы»), Нәғимә (М.Кәрим «Беҙҙең өйҙөң йәме») һәм башҡа ролдәр.

Булат Йосоповтың «Оҙон-оҙаҡ бала саҡ» нәфис фильмында Оло Инәй ролен уйнай.

"Башҡортостандың мәҙәни донъяһы" порталы Вәкилә Ҡалмантаеваның туғандарының һәм яҡындарының ауыр ҡайғыһын уртаҡлаша.