100 башҡорт халыҡ йырына патент алынған
Ошо нигеҙҙә Башҡортостандың матди булмаған мәҙәни мираҫ реестры тулылана. Тәүге исемлеккә ингән 100 йыр араһында «Абдрахман», «Ете ҡыҙ», «Ҡаһым түрә», «Байыҡ» һәм башҡа билдәле композициялар бар. Республика халыҡ ижады үҙәге белгестәренә халыҡ ижады өлгөләрен рәсмиләштереү алдынан бик күп фәнни эштәрҙе өйрәнергә тура килгән. Һәр йырҙың тарихы, ноталары һәм тексы, шулай уҡ башҡарыусыларҙың тулы исемлеге бирелгән.
Белгестәр патент алыуҙың мөһимлеген билдәләй. Бигерәк тә, глобалләшеү сәйәсәте осоронда һәр милләт үҙенә хас ҡиммәттәрен һаҡлап ҡалырға тырыша. Аңлашылмаусанлыҡтар килеп тыумаһын өсөн, патент юллау ғалимдарҙың фәнни эштәренә нигеҙләнеп башҡарыла.
Хәтерегеҙгә төшөрәбеҙ, 2018 йылда ҡурай Башҡортостан бренды булараҡ теркәлгәйне. Былтыр ул матди булмаған мәҙәни мираҫ объекты тураһындағы закон менән нығытылды.
