7 июндән 11 июнгә тиклем Ҡазан ҡалаһында Төрки телле театрҙарҙың XV Халыҡ-ара “Науруз” фестивале үтә. “Науруз” – ҙур масштаблы, йыл һайын үҙғарыла торған Рәсәйҙәге милли театрҙар фестивале. Ул 1998 йылдан алып Татарстан республикаһында уҙғарыла. Быйылғы фестивалдә Ҡаҙағстан, Әзербайжан, Таджикстан,Үзбәкстан, Төркмәнстан, Ҡырғыҙстан илдәренән һәм Рәсәйҙең милли республикаларынан театр коллективтары ҡатнаша. Фестивалдә меңдән ашыу ҡатнашыусы көтөлә. М. Ғафури исемендәге Башҡорт дәүләт академия драма театры фестивалдә режиссер А.Абушахманов сәхнәләштергән “Гөлбостан” (Ҡ. Даяндың “Таңсулпан” пьесаһы буйынса Д.Йосопов инсценировакаһы) спектаклен тәҡдим итә. Спектакль 10 июндә Ғ. Камал исемендәге Татар дәүләт академия театры сәхнәһендә 19 сәғәттә күрһәтеләсәк.