Кисә Өфө районының Шамонин ауылында балалар һабантуйы уҙҙы. Унда Шамонин, Шмитд, Бурцев ауылы балалары ҡатнашты.

Байрам олоһона ла, кесеһенә лә яҡшы кәйеф, матур ял бүләк итте. Кескәйҙәр өсөн аквагримм, һүрәт төшөрөү конкурстары, милли уйындар, квестар ойошторолғайны. Ҡыҙҙар һәм малайҙар сәс үреү, асҡыс янсығы яһау, химик тәжрибәләр үткәреү, төрлө тәмлекәстәрҙе биҙәү кеүек мауыҡтырғыс уйындарҙа ҡатнашты, батутта һикерҙе, милли кейемдә һәм йәнһүрәт геройҙары менән фотоға төштө.

Байрамда йәрминкә лә үтте. Ошо ауылдарҙа йәшәгән әсәләр ҡул эштәрен, үҙҙәре бешергән ризыҡтарҙы тәҡдим итте. Хатта ҙур ҡаҙанда былау ҙа әҙерләп алып килгәйнеләр.

Байрам мәктәп уҡыусыларының, атай-әсәйҙәрҙең сағыу сығыштары менән биҙәлде. Концертта “Ант” төркөмө артистары ла ҡатнашты.

Һабантуй ошо ауылда йәшәгән Лилиә Барлыбаеваның башланғысы һәм ата-әсәләрҙең ҙур тырышлығы менән ойошторолған. Байрамдың бағыусылары - Шамониндағы "Шоколадка", "Наша пекарня", "Вкусняшки и кудряшки", Шмидтағы сәскә магазиндары, "Мишки парк" рестораны, шәхси эшҡыуар Илһам Ҡотломбәтов.