Башҡортостан Республикаһының Халыҡтар дуҫлығы йортоноң Башҡортостан Башлығы грантын отҡан проекты географияһын киңәйтә — Свердловск өлкәһендә «Ата-бабалар ораны» төбәк-ара фестивале сиктәрендә саралар үтте.

Башҡортостан делегацияһы Свердловск өлкәһе Красноуфимск һәм Әртә райондарының биш ауылында булды. Төбәктә төп ойоштороусы — урындағы башҡорт тарихи-мәҙәни үҙәге.

Башҡорт тарихы һәм күренекле шәхестәре тураһында лекцияларҙы БР Халыҡтар дуҫлығы йорто филиалы — Туймазы районындағы башҡорт тарихи-мәҙәни үҙәгенең баш белгесе, «Без башкортлар» төньяҡ-көнбайыш башҡорттары хәрәкәте активисы Альберт Исмаил уҡыны, башҡорт ҡатын-ҡыҙҙары костюмы тураһында «Сәйетбаба» башҡорт тарихи-мәҙәни үҙәге методисы Рәйлә Сабитова һөйләне. Уның боронғоса селтәр эшләү буйынса оҫталыҡ дәрестәре ҙур ҡыҙыҡһыныу уятты. Тарихи уҡтан атыу буйынса лекцияны һәм оҫталыҡ дәресен Екатеринбург ҡалаһынан «Тарихи уҡтан атыу союзы» автономиялы коммерцияға ҡарамаған ойошмаһы президенты Александр Корюкин үткәрҙе.