Баш ҡалала «Хәрби бейеклек» республика автор патриотик йырҙар фестивале үтте
18 сентябрҙә «Торатау» конгресс-холының амфитеатрында «Хәрби бейеклек» республика автор патриотик йырҙар фестивале уҙҙы. Үҙенсәлекле ваҡиға Рәсәйҙең төрлө ҡалаларынан хәрби хәрәкәт ветерандарын һәм башҡарыусыларҙы берләштерҙе.
Фестивалде асыу тантанаһында сараға йыйылыусыларҙы Башҡортостан Республикаһы Хөкүмәте Премьер-министры урынбаҫары Ирек Сәғитов сәләмләне.
– Башҡортостан Республикаһы Хөкүмәте исеменән һәм шәхсән үҙемдән Һеҙҙе Украинала махсус хәрби операцияла ҡатнашыусы батыр яугирҙарға рухи ярҙам йөҙөнән үткәрелгән «Хәрби бейеклек» республика автор патриотик йырҙар фестивалендә сәләмләйем.
Бер аҙ тәнәфестән һуң был фестиваль йәнә ҡунаҡтарҙы ҡабул итә. Тәү сиратта, ҡунаҡсыл Башҡортостан ерендә беҙҙе бергә йыйырға мөмкинлек биргән был сараның мөһимлеген билдәләргә кәрәк. Бөгөн, илебеҙ Көнбайыш яғынан агрессия шарттарында заманса нацизмға ҡаршы көрәш алып барғанда, беҙ һеҙҙең менән берләшергә һәм күп михнәт кисергән Донбасҡа теләктәшлек күрһәтергә, ошо ауыр минутта уларға ярҙам ҡулы һуҙырға тейешбеҙ, сөнки беҙ үҙебеҙҙекеләрҙе ташламайбыҙ,– тине Ирек Сәғитов.
Фестиваль программаһы бер нисә өлөшкә бүленде. Тамашасыларға йыйылма тынлы оркестр, кадет кластары һәм хәрби-патриотик клубтар, Юнармия, Тхэквондо федерацияһының үҙенсәлекле программаһы тәҡдим ителде, Башҡортостан Республикаһының көс структуралары ансамбле сығыш яһаны. Концертты балалар һәм йәштәр ижади коллективтары һәм солистары, ҡала Мәҙәниәт һарайы һәм Өфө Йәш тамашасы театры артистарының һәм, әлбиттә, Рәсәй һәм Башҡортостан ҡалаларының легендар патриотик йыр автор-башҡарыусыларының сығыштары биҙәне. Музыкаль әҫәрҙәрен Игорь Дрягилев (Ярославль ҡалаһы), Валерий Петряев (Ярославль ҡалаһы), Артур Саянов (Севастополь ҡалаһы), Владимир Воронов (Череповец ҡалаһы), «Десант туғанлығы» төркөмө (Ульяновск ҡалаһы), «Блокпост» төркөмө (Димитровград ҡалаһы) һәм «Контингент» төркөмө (Ырымбур) тәҡдим итте.
Концерт хедлайнерҙары булараҡ Рәсәйҙең атҡаҙанған сәнғәт эшмәкәре Александр Павлов етәкселегендәге Екатеринбургтың «Уралбэнд» тынлы оркестры һәм Рәсәйҙең атҡаҙанған артисы, йырсы һәм композитор Денис Майданов сығыш яһаны.
Башҡортостандың визит карточкаларының береһенә әүерелгән «Хәрби бейеклек» патриотик йыр фестивале бөгөн тотош Рәсәйҙә билдәле. Проект йәш быуында Ватанға һөйөү, хәрби бурысҡа тоғролоҡ тәрбиәләүгә һәм Ватан геройҙары хаҡында халыҡ хәтерен һаҡлауға йүнәлтелгән.
2014 йылда Рәсәй Афғанстан ветерандары союзының Башҡортостан бүлексәһе һәм БР «Ветеран» төбәк йәмәғәт ойошмаһы әүҙемселәре илһөйәрлек идеяһы тирәләй төрлө йәштәге күмәк кешене берләштерерлек фестиваль ойоштороу тәҡдиме менән сыҡты. 2014 йылдың 19 июнендә республиканың баш ҡалаһында, «Биатлон» стадионының асыҡ концерт майҙансығында, «Хәрби бейеклек» ветеран йыры фестивале үтте.
Фестивалдең ойоштороусылары - Башҡортостандың Мәҙәниәт министрлығы, Республика халыҡ ижады үҙәге, «Рәсәйҙең Афғанстан ветерандары союзы» дөйөм Рәсәй йәмәғәт ойошмаһының Башҡортостан төбәк бүлексәһе, «Ветеран» төбәк йәмәғәт ойошмаһы, Өфө ҡалаһы ҡала округы хакимиәте.
Фотоһүрәттәр авторы: Рәмил Нафиҡов.
