М.Ғафури исемендәге Башҡорт академия драма театры 8 сентябрҙә Новокуйбышевск ҡалаһында «Алтын битлек» театр фестивале сиктәрендә «Зөләйха күҙҙәрен аса» спектаклен күрһәтә. Новокуйбышевск ҡалаһындағы фестиваль РФ Мәҙәниәт министрлығы, Президент гранттары фонды ярҙамында ойошторола һәм был ҡалала өсөнсө тапҡыр уҙғарыла. Фестивалдә Башҡорт драма театры менән бер рәттән, Мәскәү һәм Санкт-Петербург театрҙарының сығыштары көтөлә.

«Зөләйха күҙҙәрен аса» спектакле 2019 йылда «Алтын битлек» премияһының алты номинацияһына дәғүә итте: «Иң яҡшы ҙур формалы спектакль», «Иң яҡшы режиссер эше», «Иң яҡшы ҡатын-ҡыҙ роле», «Иң яҡшы рәссам эше», «Иң яҡшы костюм буйынса рәссам эше», «Иң яҡшы яҡтыртыу буйынса рәссам эше». «Алтын битлек»тең драма һәм ҡурсаҡ театрҙары жюрийының Беренсе махсус призы — «Гүзәл Яхинаның «Зөләйха күҙҙәрен аса» романын сәхнәлә уҡыған өсөн» номинацияһында еңеү яуланы.