28  майҙа Башҡортостан Республикаһының Әхмәтзәки Вәлиди исемендәге милли китапханаһында "Библиотөн - 2022" акцияһы уҙҙы. Бөтә Рәсәй күләмендәге йыл һайын уҙғарылған сара быйыл Рәсәй халыҡтарының мәҙәни мираҫы йылына арналды. Республиканың төп китапханаһындағы Библиотөн кескәй балаларҙы һәм өлкәндәрҙе, ябай китап һөйөүселәрҙе һәм билдәле шәхестәрҙе бер майҙанға йыйҙы.

Бында төрлө йүнәлештәге оҫталыҡ дәрестәре, квестар, балалар өсөн уйындар, ҡул эштәре өлгөләренән күргәҙмә-йәрминкәләр үткәрелде.

Күренекле сәсәниә Розалия Солтангәрәева бәләкәстәргә башҡорт халыҡ уйындарын уйнатты, башҡорт халыҡ ижады өлгөләре манән таныштырҙы. Башҡортостандағы иң билдәле өләсәй, йәмәғәт эшмәкәре Альбина Исхаҡова балаларға  башҡорт әкиәттәрен көйләп һөйләне.

"Башҡорт милли кейеме", "Башҡорт тамбурлы сигеүенең тылсымы" исемле баҫмалары менән милли мәҙәни мираҫты мәңгеләштереүгә ҙур өлөш индергән ғалимә Айгөл Камалиева башҡорт милли кейемен теккән йыш осоаған хаталар тураһында һөйләне, ҡул эштәре менән мауыҡҡан ҡатын-ҡыҙға оҫталыҡ дәресе уҙғарҙы. Ғөмүмән, олоһо ла, кесеһе лә күңеленә ятҡан шөғөл тапты.