Башҡортостандың Т. Сәйфуллин исемендәге Дәүләт академия хор капеллаһы Силәбе өлкәһендә үтәсәк Тынлы музыка халыҡ-ара фестивалендә ҡатнаша. Оркестр 11 сентябрь – Миәс, 12 сентябрь Магнитогорск ҡалаларында сығыш яһай.

«Фестиваль ойоштороусылар үтенесе буйынса беҙ программаға тынлы музыка әҫәрҙәрен дә, ә рус композиторҙары хоры әҫәрҙәрен, башҡорт хор музыкаһы ынйыларын да алдыҡ. Һүҙ Нур Дауытовтың «Фатима», уның эшкәртеүендә «Буранбай» йыры, «Шәл бәйләнем» башҡорт халыҡ йыры темаһына композиция һәм башҡалар хаҡында бара. Коллектив менән солистар Татьяна Чулина (сопрано), Артур Шәрипов (баритон), Илгиз Фазылов (тенор) сығыш яһай. Татар һәм ҡаҙаҡ йырҙары ла яңғыраясаҡ» – ти капелланың художество етәксеһе, баш дирижёры, Ш. Бабич исемендәге дәүләт йәштәр премияһы лауреаты Алһыу Хәсбиуллина.

Фестиваль 9 - 13 сентябрҙә Силәбе өлкәһе губернаторы Алексей Текслер ярҙамы менән үтә. Сараны Силәбе дәүләт филармонияһы ойошторған. Биш көндә Силәбе өлкәһенең ун ҡалаһында 16 концерт программаһы ҡуйыласаҡ.