Бөгөн – Бөтә донъя яҙыусылар көнө
3 март – Бөтә донъя яҙыусылар көнө. Был дата 1986 йылда Халыҡ-ара яҙыусылар клубының 12 – 18 ғинуарында уҙғарылған 48-се конгресы ҡарары менән ойошторола. Яҙыусылыҡ эшенең мөһимлеген, йәмғиәттә тотҡан урынын күрһәтеү маҡсаты менән тәҡдим ителгән был көн әҙәбиәттәрҙе, мәҙәниәттәрҙе берләштерә.
Башҡортостан Республикаһы Яҙыусылар союзы, шулай уҡ райондарҙа эшләп килгән урындағы әҙәби ойошмалар ҙа был көндө байрам итеп ҡабул итә.
Әҙәбиәт һәм йәмғиәт үҫеше айырылғыһыҙ. Һүҙ көсө һәр заманда мөһим.
Башҡорт әҙәбиәтенең сәсәндәр-йырауҙар ижадынан алып бөгөнгө заман әҙәбиәтенә тиклемге тарихы бик бай. Һәр ижадсы үҙ заманының вәкиле булараҡ үҙ һүҙен әйтә.
Башҡортостан Республикаһында яҙыусыларҙың ижади хеҙмәтен баһалау маҡсатында дәүләт наградалары, әҙәби премиялар булдырылған, фестивалдәр, юбилей даталары үткәрелә. Башҡортостан Республикаһың Милли әҙәбиәт музейы, Ә.-З. Вәлиди исемендәге Милли китапхана милли әҙәбиәттең фондын һаҡлау, үҫтереү буйынса ҙур эш алып бара.
Йәш өмөтлө ҡәләм тибрәтеүселәрҙе табыу, үҫтереү йәһәтенән дә конкурстар, әҙәби осрашыуҙар ойошторола. З.Биишева исемендәге «Китап» нәшриәтендә «Йәш тауыштар» серияһы менән йәштәрҙең тәүге китаптары баҫтырыла.
21 февралдә, Халыҡ-ара туған телдәр көнөндә, «Торатау» конгресс-холында «Әҙәби гөлләмә» фестивале сиктәрендә «Әҙәбиәттә туған телдәр бөйөклөгө» тип аталған әҙәби осрашыу үтте. Башҡортостан Республикаһың Милли әҙәбиәт музейы тарафынан уҙғарылған был фестиваль саралары йыл буйына дауам ителәсәк һәм 14 декабрь – Башҡорт теле көнөндә – тамамланасаҡ.
2023 йыл әҙәби юбилейҙарға бай йыл. Быйыл юбилейҙарын билдәләйәсәк арҙаҡлы шәхестәребеҙ Мәрйәм Бураҡаева, Наил Ғәйетбаев, Гөлфиә Юнысова, Гөлнур Яҡупова, Айһылыу Йәғәфәрова, Таңһылыу Ҡарамышева, Миңлегөл Хисамова, Марс Әхмәтшин, Әҡлимә Сафина, Зәйтүнә Шәрипова, Радик Вәхитов, Ғәли Ғатауллин ижады яңы һулыш менән дауам итер, тип ышанабыҙ. Хәким Ғиләжев, Ғилемдар Рамазанов, Муса Ғәли, Зөлфәр Хисмәтуллин, Ғаян Лоҡманов, Әхнәф Байрамов, Зәйни Рафиҡов,Мөхәмәтша Буранғолов, Ғөбәй Дәүләтшин, Дауыт Юлтый, Назар Нәжми, Зәйнәб Биишева, Ибраһим Ғиззәтуллин, Яҡуп Ҡолмой, Әнүәр Бикчәнтәев, Иван Сотников, Ғәзим Аллаяров, Ғәйнан Хәйри, Әкрәм Вәли, Шакир Насыров – быуаттар менән быуатттарҙы тоташтырып торған әҙәби мираҫ ҡалдырҙы.
Әҙәби байлығыбыҙ рухи сығанағыбыҙ булып ҡалһын, әҙиптәребеҙгә ижади ҡомар, яңы үрҙәр теләйбеҙ.
