26 июндә Өфөлә «Евразия йөрәге» алтынсы халыҡ-ара сәнғәт фестивален ябыу тантанаһы үтте. Өс көнлөк ҙур музыкаль марафон Башҡортостан, Бүрәтстан һәм Мәскәү йондоҙҙары ҡатнашлығындағы гала-концерт менән тамамланды. Йолаға әүерелгән «Ватан» амфитеатрында аяҡ баҫырлыҡ та урын юҡ ине. Гала-концерт Рәсәйҙә 27 июндә билдәләнеүсе Йәштәр көнөнә арналды.

Программаны Өфө йырсыһы, үҙ йырҙары авторы Гөлнара Байғужина асты. Ике йыл элек һәләтле ҡыҙ «Көслөрәк» («Громче») Бөтә Рәсәй йәш башҡарыусылар конкурсында беренсе урын яуланы, бер нисә тапҡыр «Рәсәй Студент яҙы» фестивале лауреаты булды. Гөлнара «Евразия йөрәге»нең финал көнөнә матур ритм бирҙе.

- Яҙмыш нисек кенә алыҫҡа алып китмәһен, һеҙҙе һәр ваҡыт тыуған ҡалағыҙҙа көтөүҙәрен хәтерҙә тоторға кәрәк, - тине йырсы.

Милли колоритлы уникаль коллектив - «Бишбармаҡ» оркестры үҙенең дәртле музыкаһы менән фестиваль ритмын көсәйтте. Коллектив ҡурайҙа, баянда, гитарала, бас-гитарала һәм клавишалы музыка башҡара.

Программаны Өфө артисы, күп кенә йырҙар авторы Эдуард Хөснөтдинов дауам итте. Һуңғы йылдарҙа ул илдә ҙур популярлыҡ яуланы. Уның “Күңел йылына” йырын 80 миллионға яҡын кеше ҡараны. Фестивалдә артист үҙенең «Мин йәшәйем, төшөнкөлөккә бирелмәйем» хиттарының береһен башҡарҙы.

Башҡортостан Республикаһы көс структураларының йыйылма вокаль ансамбле «Дәүләтемдең флагы» йырын башҡарып, концерт программаһына патриотик ноталар индерҙе. Көс структураларының ҡатнашыуы «Евразия йөрәге» фестиваленең яңы йолаһына әүерелә: 2020 йылда Мәскәү ҡалаһынан Рәсәй Федерацияһы милли гвардияһы ғәскәрҙәренең Өлгөлө оркестры сығыш яһаны.

Артабан фестивалдә тамашасыларҙың яратҡан йырсыһы Наил Тимербаев сығыш яһаны. Ул заманса эшкәртеүҙәге «Айҙар ғынайым» күңелле башҡорт халыҡ йырын һәм шулай уҡ заманса дәртле «Алло, ҡабул ит» йырын башҡарҙы.

Бүрәтстан ҡунаҡтары - «Намгар» төркөмө - тамашасыларға яңы альбомынан йырҙар бүләк итте. Солист Намгар Лхасаранова билдәләүенсә, һәр йырҙың үҙ тарихы бар.

- Беҙ үҙенсәлекле эшкәртеүҙә боронғо халыҡ йырҙарын йырлайбыҙ. 2019 йылда ире Евгений Золотарёв менән бергә архивтарҙа күп эшләнеләр. Һөҙөмтәлә 2021 йылда «Nayan Navaa» альбомы донъя күрҙе. Был «Ата-бабалар ере» тигәнде аңлата. Был йырҙар бөтә донъя буйлап таралды, Өфө тамашасыларына ла оҡшар, тип ышанабыҙ, - тип һөйләне Намгар Лхасаранова.

Шуны билдәләп үтәйек: төркөм «Евразия йөрәге»ндә икенсе тапҡыр ҡатнашты, бынан алда улар 2016 йылда килгәйне.

Бүрәт халыҡ көйҙәренән һуң тамашасылар башҡорт рок музыкаһына сумды - сәхнәгә легендар «Дәрүишхан» төркөмө сыҡты, ул утыҙ йыл дауамында республикалағы иң популяр коллективтарҙың береһе булып ҡала. Уларҙың «Эх, Зөлфиә», «Уралым байлыҡтары», «Төн» йырҙарын бөтә амфитеатр ҡушылып башҡарҙы.

Фестивалдең хедлайнеры Сергей Трофимов тамашасыларҙы үҙенең хиттары менән ҡыуандырҙы. Артист сәхнәлә бейеү баттлы ойошторҙо һәм тамашасылар араһынан ике егетте саҡырҙы. Йыр дауамында улар үҙҙәренең бейеү буйынса һәләттәрен күрһәтте. Йырсы уларға иҫтәлекле сувенирҙар бүләк итте һәм киләһе фестивалдә уларҙың ҡатнашыуын ойошторорға вәғәҙә итте.

Артабан Сергей Трофимов номерҙы биҙәү өсөн ҡыҙҙарҙы бейергә саҡырҙы. Иң йәш бейеүсе сәхнәнән китергә ашыҡманы һәм "Йәшлек" йырын башҡарыуҙы һораны. Сергей Трофимов юғалып ҡалмай һәм: "Хәҙер мөхәббәт, йәшлек һәм мәңгелек  хаҡында йыр була", - тип белдерҙе. Үҙ сығышын тамамлап, артист Башҡортостанда иң матур ҡыҙҙар булыуын билдәләне.

Тамашасылар "Дискотека Авария" төркөмөн түҙемһеҙләнеп көттө. Сығыш феерик шоуҙан башланды, артистар рухи яҡтан ғына түгел, тәне менән дә йәш булыуын, дәртле ритмдарға һикереп, бейеп иҫбатланы. Ә бейеү майҙанында эҫе булып китте, тамашасылар яратҡан моң аҫтында йырланы һәм бейене.

Фестиваль ғәҙәттәгесә йәш йондоҙҙар: Рәфис Сирусин, Гөлшат Ғирфанова, Полина Кобец һәм Сияуш Шерматзаде башҡарыуында “Евразия йөрәге” халыҡ-ара сәнғәт фестивале гимны менән тамамланды.