Хәйбулла районында Йомабай Иҫәнбаев исемендәге Республика ҡурайсылар конкурсы асылды
Хәйбулла районында Йомабай Иҫәнбаев исемендәге Республика ҡурайсылар конкурсы асылды. Был сара ҡурайҙа уйнау йолаларын һаҡлауға, тергеҙеүгә һәм артабан үҫтереүгә, һәләтле башҡарыусыларҙы асыҡлауға ҡурайҙа уйнау сәнғәтен йәйелдереүгә йүнәлтелгән.
«Бөгөн Хәйбулла районында башҡорт халҡының милли уйын ҡоралына арналған сағыу байрамдарҙың береһе уҙа. Йомабай Иҫәнбаев ҡурайҙа профессиональ башҡарыу сәнғәтенә нигеҙ һалыусыларҙан иҫәпләнә. Ул сит ил сәхнәһендә милли сәнғәтте күрһәткән тәүге башҡорт музыканттарының береһе булды», - тип билдәләне Республика халыҡ ижады үҙәгенең генераль директоры урынбаҫары Нәфисә Тулыбаева һәм ҡатнашыусыларҙы Башҡортостан Республикаһының Мәҙәниәт министрлығы исеменән сәләмләне.
Тантаналы сарала Хәйбулла районы Советы рәйесе Тимур Рәмов, Рәсәйҙең һәм Башҡортостандың атҡаҙанған мәҙәниәт хеҙмәткәре, Башҡортостандың халыҡ артисы, Башҡортостандың Салауат Юлаев исемендәге дәүләт премияһы лауреаты Юлай Ғәйнетдинов ҡатнашты.
Быйыл конкурс 1812 йылғы Ватан һуғышында еңеүҙең 210 йыллығына арналды. Тантаналы өлөштән һуң Туймазы, Ауырғазы, Күгәрсен, Йылайыр, Учалы, Хәйбулла, Белорет, Әбйәлил, Баймаҡ райондарынан, Күмертау, Сибай һәм Өфө ҡалаларынан ансамблдәр ошо тарихи ваҡиғаға арналған көйҙәрҙе башҡарҙы. Улар араһында башҡорт халыҡ йыры «Кутузов», «Аллаяр батыр», «Наполеон Бонапарт», «Маршрут» һәм башҡалар яңғыраны. Башҡорт халыҡ йыры «Ҡаһым түрә»не Башҡортостандың атҡаҙанған мәҙәниәт хеҙмәткәре Ғәзим Ильясов башҡарҙы.
Ҡурайсылар бәйгеһе Башҡортостан, Марий Иле республикаларынан, Красноярск крайынан 300-ҙән ашыу ҡатнашыусыны йыйҙы.
Сара барышында алдағы конкурстар лауреаттары, халыҡ йырсылары, бейеүселәр һәм быйылғы конкурс еңеүселәре ҡатнашлығында концерттар, ҡурайсылар ансамблдәре етәкселәре өсөн түңәрәк өҫтәл күҙалланған.
Иртәгә, 17 сентябрҙә, Аҡъяр ауылының Үҙәк мәҙәниәт һәм ял паркында Йомабай Иҫәнбаев исемендәге Республика ҡурайсылар конкурсын ябыу тантанаһы һәм Гала-концерт үтәсәк. Сара көндөҙгө сәғәт 3-тә башлана.
Конкурстың йоштороусылары - Башҡортостан Республикаһының Мәҙәниәт министрлығы, Республика халыҡ ижады үҙәге, Хәйбулла районы хакимиәте, Башҡортостан Республикаһының ҡурайсылар союзы йәмәғәт ойошмаһы.
