«Тамыр» телеканалы «Ҡайтыу юлы» исемле документаль фильм төшөрҙө
Күгәрсен районында «Ҡайтыу юлы» тип исемләнгән документаль фильмдың исем туйы үтте. «Тамыр» телеканалы төшөргән фильмды тәүгеләрҙән булып яугирҙың яҡташтары ҡараны.
Картина Сталинград өсөн алышта һәләк булған Хәйбулла Хисмәтуллин хаҡында. Күгәрсен районында тыуып-үҫкән яугир 228-се штурм авиация дивизияһының 694-се штурм авиация полкы летчигы булып хеҙмәт иткән. 1942 йылда яҡындары алған «ҡара ҡағыҙ»ҙа Хәйбулла Хисмәтуллин дошмандың 26 танкыһын, 22 автомашинаһын һәм бер самолетын юҡ итеүе тураһында бәйән ителгән. Эҙәрмәндәр отряды тарафынан 78 йылдан һуң табылған летчик-штурмлаусы былтыр тыуған төйәгендә ерләнде.
Тарихи сығанаҡтар буйынса, 19 йәшлек Хәйбулла Хисмәтуллиндың Сталинград өсөн алышта һәләк булыуы мәғлүм. Тик яугирҙың ҡайҙа ерләнеүе яҡындарына билдәһеҙ була. 78 йылдан һуң, Көйөргәҙе районы «Ҡаһарманлыҡ» эҙәрмәндәр отряды тарафынан яҡташыбыҙҙың һуңғы төйәге табыла. Быға күп һанлы эҙләнеүҙәр, тарихи сығанаҡтарға мөрәжәғәт итеүҙәр булышлыҡ иткән.
Хәйбулла Хисмәтуллинға арналған фильм премьераһынан һуң, тамашасылар летчик-штурмлаусы ерләнгән урынға зыярат ҡылды.
