Өфөлә Әҙеһәм Исҡужин исемендәге VI асыҡ ҡала ҡурайсылар конкурсы уҙғарыла. Ул Башҡортостан Республикаһының атҡаҙанған мәҙәниәт хеҙмәткәре, күренекле ҡурайсы, педагог Әҙеһәм Динислам улы Исҡужиндың иҫтәлеген мәңгеләштереү маҡсатында иғлан ителгән.

Бәйгенең ойоштороусылары – Өфө хакимиәтенең Мәҙәниәт һәм сәнғәт буйынса идаралығы, БР Республика халыҡ ижады үҙәге, "Башҡортостан Республикаһының Ҡурайсылар союзы" төбәк йәмәғәт ойошмаһы, Әҙеһәм Исҡужин исемендәге Балалар сәнғәт мәктәбе һәм "Моторҙар эшләүсе" мәҙәниәт һарайы.

Ижади ярышта солистар - Өфө, Башҡортостан Республикаһы ҡалалары һәм райондары, Рәсәй Федерацияһы субъекттары ҡурайсылары ҡатнаша ала. Ҡатнашыу өсөн 2021 йылдың 19 ноябренә тиклем dshi-2020 @ mail.ru электрон почтаһына ғариза һәм ата-әсәләрҙең (ҡатнашыусының) шәхси мәғлүмәттәрен эшкәртеүгә ризалығын ебәрергә кәрәк. Заявкала видеосығышҡа һылтанманы яҙырға кәрәк.

Конкурс өс йәш категорияһы буйынса ике турҙа уҙғарыла: 12 йәшкә тиклем, 12-нән 16 йәшкә тиклем һәм 16 йәштән өлкәнерәктәр.

Конкурс тураһында мәғлүмәт менән  положениела ентекләберәк танышырға мөмкин.