Күптән түгел Ғафури районының үҙешмәкәр театр коллективтары ҙур һынау үтте: спектаклдәр әҙерләп, Район мәҙәниәт һарайы сәхнәһендә өс йылға бер раҫланырға тейеш булған "халыҡ” исемен яҡлап сығыш яһаны. Эшләп килгән 5 халыҡ театрының 4-һе республика Халыҡ ижады үҙәгенең театр буйынса төп белгесе Тәнзилә Сәғит ҡыҙы Ҡалмырҙина алдында һынау тотто. 
Еҙем-Ҡаран ауыл мәҙәниәт йортоноң "Ҡараншишмә” халыҡ театры Гөлшат Зәйнәшеваның "Ғәйфи бабай, өйлән давай!”  комедияһын һайлаған.

А.Ғөзәйеров исемендәге Бурлы ауылы мәҙәниәт йорто драма коллективы Флорид Бүләковтың "Бабай урлау” комедияһын сәхнәләштергән.

Театр белгесе Т.Ҡалмырҙина ижади коллективтарҙы һынауҙы уңышлы үтеүҙәре менән ҡотланы, шул уҡ ваҡытта етешһеҙлектәрҙе лә барланы, фәһемле кәңәштәрен дә әйтте. Рәхмәт һүҙҙәрен белдереп, артабан да уңышлы ижади эҙләнеүҙәр, яңы сәхнә әҫәрҙәре менән һөйөндөрөүҙәрен теләне.