«Башинформ» мәғлүмәт агентлығы хәбәр итеүенсә, 16-17 мартта  Өфөлә ҡумыҙсыларҙы һәм өзләүселәрҙе Республика яңғыҙ башҡарыусылар һәм ансамблдәр семинарына йыялар.

Семинарҙа  Башҡортостан Республикаһының атҡаҙанған мәҙәниәт хеҙмәткәре, республиканың Шәйехзада Бабич исемендәге дәүләт йәштәр премияһы лауреаты, «Донъяның виртуоз ҡумыҙсыһы» халыҡ-ара конкурс лауреаты Миңлеғәфүр Зәйнетдинов; Башҡортостандың атҡаҙанған мәҙәниәт хеҙмәткәре, 2009 йылда Төбәк-ара ҡумыҙсылар һәм өзләүселәр конкурсы еңеүсеһе Илһам Байбулдин; республиканың атҡаҙанған мәҙәниәт хеҙмәткәре, 2011 йылда Төбәк-ара ҡумыҙсылар һәм өзләүселәр конкурсы еңеүсеһе Артур Ғайсаров; Республика халыҡ ижады үҙәгенең халыҡ ижады бүлеге етәксеһе Эльвирә Әхмәтйәнова ҡатнашыуы көтөлә.

Семинар 8-9 июндә «Берҙәмлек» халыҡ-ара милли мәҙәниәттәр фестивале сиктәрендә уҙасаҡ Төбәк-ара ҡумыҙсылар һәм өзләүселәр конкурсына әҙерлек сиктәрендә ойошторола. Конкурс Мәсетле районының Оло Ыҡтамаҡ ауылында үтәсәк.  Өзләүселәр, ҡумыҙҙа яңғыҙ башҡарыусылар һәм ансамблдәр ҡатнашасаҡ.