Йыл да Башҡортостан театр эшмәкәрҙәре союзы профессиональ театр актерҙары араһынан иң маһир һүҙ оҫтаһын һайлай. Быйылғы бәйге 21 ноябрҙә Б.Йосопова исемендәге Актерҙар йортона унынсы тапҡыр уҙғарылды. Бәйгелә утыҙға яҡын һүҙ оҫталары көс һынашты. Әлбиттә, һүҙ оҫтаһы булыу өсөн туҡтауһыҙ эҙләнеүҙәр, күнекмәләр талап ителә. Конкурсанттар араһында тетрәндергес итеп, образға инеп шиғыр һөйләүселәр һоҡланыу тойғоһо уятты. Һүҙ оҫталары ярышында Гран-при исеменә Уильям Шекспир трагедияһынан Гамлет монологын уңышлы башҡарып, М. Кәрим исемендәге Милли йәштәр театры актеры Рәмзил Сәлмәнов лайыҡ булды. Назар Нәжмиҙең “Күлдәк” поэмаһы өсөн М. Ғафури исемендәге Башҡорт дәүләт академия драма театры актрисаһы Айһылыу Йомағолова I урынға лайыҡ булды! Икенсе урынды М. Кәрим исемендәге Милли йәштәр театры актеры Ильгиз Таһиров һәм Башҡорт ҡурсаҡ театры актеры Артем Сәмиғуллин бүлеште. Ә өсөнсө урын Йәш тамашасылар театры актеры Наиль Сафинға һәм Стәрлетамаҡ рус драма театры актрисаһы Регина Рушатоваға бирелде. «Вечерняя Уфа» гәзитенең махсус бүләгенә Рус академия драма театры актрисаһы Ольга Лукьянова лайыҡ булды. Шулай уҡ З. Исмәғилев исемендәге Өфө дәүләт сәнғәт институты студенттары ла призлы урындар яуланы. Артабан да телгә, һүҙ нәфислегенә ҡарата һөйөү дауам итһен! Гүзәл Багаева