Мәжит Ғафури исемендәге Башҡорт академия драма театрының бер төркөм артистары Мифтахетдин Аҡмулла исемендәге Башҡорт дәүләт педагогия университетының (педагогия, социаль гуманитар факультеттары) студенттары менән осрашты. Һөйләшеү темаһы Сыңғыҙ Айтматов әҫәре буйынса ҡуйылған "Аҡ пароход" спектаклен ҡарағандан һуң тыуған уйҙар, тип билдәләнһә лә, диалог ижад, әҙәбиәт, театр тураһында ғына түгел, хатта әхлаҡи, тәрбиәүи проблемаларҙы ла ҡуҙғатты.

"Мин үҙем бара алмаһам да, иптәш ҡыҙым барып ҡараған. Спектакль миңә шул тиклем тәьҫир итте, ул шул тиклем тормошсан. Спектаклдә үҙемдең һорауҙарыма яуаптар таба алдым, тип бүлеште ул".

"Тулыһынса асылып әйтәм, спектаклде аҙаҡҡа тиклем ҡарап бөтә алманым. Ул шул тиклем тетрәндергес. Шул тиклем күңелде ярһыта, барыһы ла үтә лә тормошсан хаҡ итеп һүрәтләнә, түҙеп тороп булманы..."

"Спектакль авторҙың тексына иғтибарлы ҡарашы менән һоҡландыра".

"Спектакль бөтә яҡтан да уйланылып эшләнгән. Ә музыкаһы... Иҫ китерлек!.."

"Актерҙарҙың һәр береһен айырып әйтеп булмай. Әсәйем менән бергә барып ҡараныҡ. Икәүләшеп илашып ҡайттыҡ. Мин геройҙарҙа үҙемдең ауылдағы кешеләрҙе таныным..."

Балаларҙың яңғыҙлығы, үҫмерҙәрҙең үҙ-үҙенә ҡул һалыуы, ышаныс һәм өмөт, йәмғиәт, кеше күңеле, миһырбанлылыҡ, йөрәк йылыһы, әҙәп-намыҫ тураһында һөйләште Башдрамдың артситары - Башҡортостандың халыҡ артисткаһы Рәмзиә Хисамова, артистар Фәнис Рәхмәтов, Зилиә Ситдиҡова, Фирғәт Ғарипов.

Осрашыуҙы ойоштороусы Айһылыу Йомағолова студенттар менән тағы ла театрҙа күрешергә, аҙаҡ ошондай йәнле һөйләшеүҙәргә йыйылырға, тип һүҙ биреште.

Сығанаҡ: М. Ғафури исемендәге Башҡорт дәүләт драма театры сайты