Һуҡырҙар өсөн Башҡортостан республика махсус китапханаһында бөйөк композитор, Д. Шостакович, Ғ. Сәләм исемендәге, халыҡ-ара “Филантроп” премиялары лауреаты Салауат Низаметдиновтың тормош һәм ижад юлына арналған мемориаль мөйөш ойошторолған. Китапхана сайтында виртуаль күргәҙмә менән танышырға мөмкин. https://www.youtube.com/watch?v=bQGoX9VWn5E&feature=youtu.be

Бар ғүмерен Салауат Низаметдиов музыкаға арнаған. Уның жанр диапазоны ифрат киң: опера, симфония, хор, романс, драма әҫәрҙәренә көйҙәр, эстрада йырҙары.

Композитор махсус китапхананың әүҙем уҡыусыһы ғына түгел, ә дуҫы ла ине, тип яҙалар Һуҡырҙар өсөн Башҡортостан республика махсус китапханаһы сайтында. Классика яратты, йәш шағирҙарҙың шиғырҙарын уҡыны, балалары өсөн мәктәп программаһы буйынса әсбаптар алды. Танылыу яулағас, китапханала уның ижад кисәләре уҙғарылды. 2003 йылда “Артылыу” (“Восхождение”) исеме аҫтында композиторҙың ижадына арналған тәүге электрон китап нәшер ителде. Уның йырҙарын, симфоник оркестр өсөн әҫәрҙәрен китапхана тауышландырылған вариантта әленән-әле сығарып торҙо. 50 йәшлек юбилейына тулы текстлы “Маэстро-50” биобиблиографик электрон күрһәткес, ә 55 йәшлек юбилейына “Һынмаған нота” (“Несломленная нота”) исемле күрһәткес сығарылды.

2013 йылда Л. Брайль шрифты буйынса һәм тауышландырылған вариантта Салауат Низаметдиновтың, Виктория Симонова менән берлектә яҙылған, “Тәүбә” (“Исповедь”) тигән хәтирәләр китабы баҫтырылды.

Салауат Низаметдинов ижады мәңгелек, композитор тураһындағы яҡты хәтирәләр һәм иҫтәлектәр беҙҙең күңелдәрҙә мәңге һаҡланыр.