Башҡортостан юлдаш телевединиеһы хәбәр итеүенсә, Өфө «Нур» татар дәүләт театры ижад миҙгелен «Башмағым» спектакле менән асты.
Музыкаль комедия тәүге тапҡыр  сирек быуат элек ҡуйылған, уҙған ижад миҙгелендә, театрҙың 25 йыллығын билдәләгәндә республика халҡына бүләк итеп, әҫәр яңынан заманса сәхнәләштерелде.

Костюмдарҙың сағыулығын, декорацияларҙы, актерҙарҙың тере тауышҡа йырлауын тамашасылар юғары баһаланы.

«Театр яҙы – 2017» төбәк фестивалендә лә спектаклдә Кәрим ролен башҡарыусы Айрат Фәтихов «Иң яҡшы ир-егет» номинацияһында еңеү яулаһа,  режиссер Байрас Ибраһимов тәнҡитселәр коллегияһының махсус призына лайыҡ була. Артистар «Башмағым» спектакленең киләсәге  өмөтлө тигән ҡарашта.

Театр коллективы яңы ижад миҙгелендә кескәй тамашасылар өсөн социаль проект та әҙерләгән. Уның сиктәрендә балаларға юл хәрәкәте хәүефһеҙлеге ҡағиҙәләре сәхнәләштереү аша аңлатыласаҡ. Шулай уҡ 29 һәм 30 сентябрҙә 18 йәштән өлкәнерәктәр өсөн «Үткәндән килгән ханым» спектакленең премьераһы була. Ул немец драматургы Роланда Шиммельпфенниг әҫәре буйынса ҡуйылған.