Кисә, 6 октябрь көнө, Өфө ҡалаһында “Башҡорттар” исемле коллектив монографияһының тантаналы презентацияһы булып үтте. Баҫма Рәсәй фәндәр академияһының Н.Н. Миклухо-Маклай исемендәге Этнология һәм антропология Инстититутының “Халыҡтар һәм мәҙәниәт” проекты ярҙамында донъя күрҙе.

Тантаналы сарала Башҡортостан Республикаһының Хакимиәте, Башҡортостан Республикаһының Дәүләт Йыйылышы -Ҡоролтай, Мәҙәниәт министрлығы, Бөтә донъя башҡорттары ҡоролтай башҡарма комитетының, БР-ның фәндәр Академияһының вәкилдәре, йәмәғәт эшмәкәрҙәре ҡатнашты.

Мәҙәниәт министрының беренсе урынбаҫары Валентина Латыпова барыһын да тантаналы сара менән тәбрикләне. Монографияның нәшер ителеүе – республикабыҙҙың фән һәм мәҙәниәт донъяһында ҙур ваҡиға булыуын әйтеп уҙҙы.

Монографияның авторҙары-Рәсәй фәндәр Академияһының Этнология һәм антропология Институты, Өфө ғилми үҙәгенең тарих, тел һәм әҙәбиәт Институты, Р.Ғ. Кузеев исемендәге Этнологик тикшеренеүҙәр Институтының ғилми хеҙмәткәрҙәре.

Республикабыҙҙың фәндәр Академияһының вице-президенты Айтуған Аҡманов үҙ сығышында баҫманың киң билдәлеләк яулауына ышаныс белдерҙе.

Китаптың тиражы 3 мең экземпляр тәшкил итә.

Рәсәй Федерацияһының халыҡтары араһында иҫәбе буйынса дүртенсе урын биләгән, башҡорт халҡына бағышланып нәшер ителгән был китап, ысынлап та, барыбыҙ өсөн дә ҙур бүләк.


Сығанаҡ: Башҡортостан Республикаһының мәҙәниәт министрлығы